Վարչապետ Նիկոլ Փաշինյանը չի բացառում արտահերթ խորհրդարանական ընտրությունների անցկացումը, եթե նոր Սահմանադրությունը հանրաքվեի դնելու համար չստանան խորհրդարանական ընդդիմության աջակցությունը: Միևնույն ժամանակ նշեց՝ նախ փորձելու են համաձայնության գալ ընդդիմադիրների հետ: «Կփորձենք համոզել ընդդիմության մեր գործընկերներին, որ սա շատ կարևոր հարց է։ Չստացվեց, ուրեմն կգնանք ուրիշ սցենարներով, այդ թվում՝ կարող ենք նաև արտահերթ ընտրություններ անել։ Իսկ ո՞վ է ասել, որ նման սցենարը բացառված է», - այսօր «Ազատության» հարցին ի պատասխան հայտարարեց Փաշինյանը, որի կուսակցությունը վերջին խորհրդարանական ընտրություններում սահմանադրական մեծամասնություն չստացավ: Թե՛ վարչապետը, թե՛ արդարադատության նախարարը վստահեցնում են՝ նոր Սահմանադրության նախագիծը կհրապարակվի մինչև տարեվերջ, ինչից հետո այն կդրվի հանրային քննարկման, ապա կուղարկվի Ազգային ժողով: Նախագծի ընդունման համար անհրաժեշտ է առնվազն 70 պատգամավորի կողմ քվեարկություն: «Քաղաքացիական պայմանագիրն» ունի 64 մանդատ, այսինքն՝ իշխանությանը պակասում է ևս 6 ձայն: Խորհրդարանական ընդդիմադիր երկու խմբակցությունները պարբերաբար են հայտարարել՝ «կողմ չեն քվեարկելու Ալիևի պարտադրած Սահմանադրությանը»: «Ուժեղ Հայաստան» խմբակցության քարտուղարն այսօր վերահաստատեց իրենց ուժի դիրքորոշումը: «Հայաստանը չպետք է իր Սահմանադրությունը փոխի որևիցե այլ արտաքին ուժի՝ տվյալ դեպքում Իլհամ Ալիևի պահանջով: Մենք դեմ ենք Սահմանադրությունն Ալիևի պահանջով փոխելուն», - ասաց Տիգրան Աբրահամյանը: «Ազատության» հարցին՝ կարո՞ղ է լինել որևէ իրավիճակ, որ «Ուժեղ Հայաստանի» որևէ պատգամավոր միանա այդ օրակարգին, Աբրահամյանը պատասխանեց. «Մեր ֆրակցիան ունի դիրքորոշում, որ Հայաստանը չպետք է իր Սահմանադրությունը փոփոխի արտաքին ուժերից որևէ մեկի պահանջով»: Վարչապետն ու նրա թիմակիցներն արդեն բացահայտել են նոր Սահմանադրության նախագծի գլխավոր փոփոխությունը. այն չի պարունակելու հղում Անկախության հռչակագրին: Սա հենց այն նախապայմանն է, որի կատարումից հետո, ըստ էության, Բաքուն կստորագրի խաղաղության պայմանագիրը: Անկախության հռչակագրին հղումը Մայր օրենքից հանելուն կտրուկ դեմ է խորհրդարանական ընդդիմադիր մյուս ուժը՝ «Հայաստան» խմբակցությունը: «Դա հստակ ձևավորված պահանջ է Ադրբեջանի կողմից: Մարդիկ քանի՞ անգամ պետք է ասեն: Փաշինյանին իրենք պարտադրում են փոխել Սահմանադրությունը: Փաշինյանն էլ փոխանակ երկրի դիմակայությունը բարձրացնի, փորձում է միջնորդ հանդիսանալ Ադրբեջանի ու հայ ժողովրդի միջև ու հայ ժողովրդին պարտադրել, որպեսզի ադրբեջանական պահանջները կատարեն», - նշեց Արթուր Խաչատրյանը: Վարչապետն այսօր դարձյալ շեշտեց՝ նոր Սահմանադրություն ունենալու որոշումը կապ չունի Ադրբեջանի հետ: Մինչդեռ 2024 թվականի փետրվարին հենց Նիկոլ Փաշինյանն իր հայտնի հարցազրույցում, «կարմիր շորի և ցլի» համեմատությամբ, նշում էր՝ եթե Անկախության հռչակագրից չազատվենք, պատերազմ կլինի: Նույն այդ օրերին նաև արտգործնախարար Արարատ Միրզոյանն էր հաստատել, որ Ադրբեջանը խնդիրներ է տեսնում Հայաստանի Անկախության հռչակագրում։ Թեև նախկինում թե՛ վարչապետը, թե՛ արտգործնախարարն ասում էին, որ հայկական կողմը նույնպես խնդիրներ է տեսնում Ադրբեջանի Սահմանադրության մեջ, այժմ որևէ հայ պաշտոնյա այդ մասին չի խոսում: Փոխարենը Նիկոլ Փաշինյանն այսօր տեղեկացրեց, որ Ադրբեջանի նախագահի հետ Հայաստանի Սահմանադրության հարցը քննարկել են երկու ամիս առաջ Բիշքեկում: «Ես ասել եմ ադրբեջանական կողմին, որ Ադրբեջանից մեր Սահմանադրության հետ կապված հարցեր են բարձրացվում, որովհետև դա մեր ներքին օրակարգն է», - ընդգծեց վարչապետը: Ալիևն, ըստ Նիկոլ Փաշինյանի, ընդունել է, որ դա Հայաստանի ներքին գործն է, միևնույն ժամանակ ընդգծել է, որ իրենց քաղաքական դիրքորոշումն այդ հարցով չեն փոխվելու: Այս դիրքորոշումը չփոխելուց բացի Բաքվից նաև հրապարակային դժգոհում են, որ Հայաստանն այդ հարցում հապաղում է: Երեկ Ադրբեջանի խորհրդարանի պատգամավոր, արտաքին հարաբերությունների անդամն է «Իքս»-ում գրել՝ «մտագոհված են և իրենց թվում է՝ Հայաստանը ցանկություն չունի իր Սահմանադրությունից հանելու Ադրբեջանի նկատմամբ տարածքային պահանջները»: Նիկոլ Փաշինյանն այսօր հիշեցրեց՝ նոր Սահմանադրության ընդունումը թե նախընտրական, թե կառավարության ծրագրի մաս է: Ինքն այդ հանձնառությունից չի հրաժարվի միայն այն պատճառով, որ այն համընկնում է Բաքվի օրակարգի հետ: Վարչապետն ավելի հեռուն գնաց՝ հայտարարելով, որ եթե նոր Սահմանադրության ընդունման ու խաղաղության պայմանագրի ստորագրման հարցերում չհաջողի, իր քաղաքական առաքելությունն ավարտված կհամարի:: «Ես կարծում եմ, որ եթե Հայաստանի ժողովուրդն ուզում է տեսնել այդ հանձնառությունը իրագործված, ուրեմն ժողովուրդի հետ միասին պետք է իրագործի: Եթե Հայաստանի ժողովուրդը չի տեսնում այդ հանձնառությունը իրագործելու հանձնառություն, մի X պահի կարա պարզվի, որ իմ քաղաքական առաքելությունը սպառված է», - այսօր ասաց Փաշինյանը: Ինչ վերաբերում է խաղաղության համաձայնագրի ստորագրմանը, ապա վարչապետն այսօր որպես հնարավոր ժամկետ նշեց 2027-2028 թվականները՝ ամենայն հավանականությամբ հույս ունենալով, որ մինչև այդ Հայաստանը կունենա նոր Սահմանադրություն: Խաղաղության համաձայնագիրը նախաստորագրվել է 2025 թվականի օգոստոսին, Վաշինգտոնում՝ ԱՄՆ նախագահ Դոնալդ Թրամփի ներկայությամբ: