Ազգային ժողովի նիստում բանավեճ ծավալվեց 3 փոխնապագահների միջև՝ ապօրինի ծագում ունեցող գույքի բռնագանձման օրենքի և դրա վերաբերյալ Սահմանադրական դատարան ներկայացված դիմումի շուրջ։ Վահագն Ալեքսանյանը հայտարարեց, որ կոռուպցիայի դեմ պայքարը ՔՊ-ի քաղաքական առաջնահերթություններից է, և հիշեցրեց ապօրինի ծագում ունեցող գույքի բռնագանձման մասին օրենքի ընդունումը։ «Կոռուպցիայի դեմ պայքարը դա մեր քաղաքական ԴՆԹ-ն է… մենք ընդունել ենք «Ապօրինի ծագում ունեցող գույքի բռնագանձման մասին» օրենքը… Ընդդիմադիր պատգամավորական խմբակցությունները… որոշում են, համախմբվում են ու ասում են․ «Մենք այս հարցով կդիմենք Սահմանադրական դատարան, կդիմենք ու կբողոքարկենք, որպեսզի այս օրենքը հանկարծ չգործի»»,- ասաց Ալեքսանյանը։ Նա պնդեց, որ ընդդիմությունը փորձել է խոչընդոտել օրենքի կիրառմանը, սակայն այն այսօր գործում է, և ապօրինի ծագում ունեցող գույքի բռնագանձման գործընթացները շարունակվում են։ Ալեքսանյանի հայտարարություններին արձագանքեց Արամ Վարդևանյանը՝ նշելով, որ Սահմանադրական դատարան դիմելու նպատակը եղել է օրենքում առկա իրավական խնդիրների վերացումը։ «Պատկերացրեք, եթե օրենքը ունենում է տարրական, Եվրոպական դատարանի նվազագույն չափանիշներին չհամապատասխանող կարգավորումներ, դա դառնում է չարիք պետության համար, որովհետև ստացվում է՝ այն նպատակը, որի համար այդ գործիքը իրացվում է, դրանից հետո հակառակն է լինելու․… ձեր մշակած այդ օրենքը անորակ էր»,- ասաց Վարդևանյանը։ Նրա խոսքով՝ Սահմանադրական դատարանը հաշվի է առել դիմումում ներկայացված մի շարք դիրքորոշումներ և իր որոշմամբ անդրադարձել օրենսդրական բացերին։ Բանավեճին միացավ նաև ԱԺ փոխնախագահ Հայկ Կոնջորյանը։ «Քիչ առաջ մենք բացահայտեցինք, որ պարոն Վարդևանյանը և նախորդ գումարման ընդդիմադիր խմբակցությունները ապօրինի գույքի բռնագանձման օրենքի հարցով դիմել են Սահմանադրական դատարան այն բանի համար, որպեսզի այդ օրենքը լավ կիրառվի, ոչ թե որ այդ օրենքը չեղարկվի»,- ասաց Կոնջորյանը։ Նա շարունակեց՝ անդրադառնալով նաև երկրորդ նախագահ Ռոբերտ Քոչարյանին։ «Ռոբերտ Քոչարյանը, մասնավորապես, ենթադրում եմ, որ հրավիրել է պարոն Վարդևանյանին… ասել է․ «Ո՛չ, ես պիտի վերադարձնեմ ինձ վերագրվող ապօրինի գույքը, Արամ, պարո՛ն Վարդևանյան, գնա և ձևակերպիր մի կարևոր դիմում»»,- հայտարարեց Կոնջորյանը։ Ելույթի ավարտին Կոնջորյանն ասաց, որ ընդդիմության ներկայացրած փաստարկները, իր գնահատմամբ, իրականության հետ որևէ աղերս չունեն։ Մանրամասները՝ տեսանյութում։ Աշոցքում ՔՊ-ի ավագանու ընտրական ցուցակը կգլխավորի Կարեն Մանուկյանը «Ապրելու երկիրը» կմասնակցի Կապանի ՏԻՄ ընտրություններին․ ցուցակը կգլխավորի Տիգրան Աղասյանը Փաշինյանը հանձնարարել է զարգացնել պետական համակարգում երիտասարդների ներգրավման մեխանիզմները